Чындыктын баасы

Бул дүйнө жалганга толуп-ташканын билесиңби? Анткени жалган таттуу. Чындык – ачуу. Жалган – нафстын талабы, чындык – Хактын талабы.

Пенде дүйнөгө Хакты сүйүү үчүн келди. Хакка болсо чындык менен барылат. Бирок сүйгөнгө жетүү дайыма кыйын болгондой эле, чындык жолунда жүрүү машакаттуу. Чындыктын баасы кымбат.

Бул жолдо кандай баа бар? Уул ак жолдогу атага каршы чыгып, инисин өлтүрүшү мүмкүн. Антпесе, Кабыл Абылды өлтүрмөк беле? Аялың жана балаң азгырылып, кыйроого учурашы мүмкүн, антпесе, Нух алейхиссаламдын аялы жана уулу кыйрамак беле?

Жийиркеничтүү коомун сүйгөн аял күйөөсүнүн акыйкат экенин биле туруп, жийиркеничтүүлүктү сүйө бериши мүмкүн, болбосо, Лут алейхиссаламдын аялы ыпластыкка баткан уруусунун кыйрашы үчүн ах урмак беле?

Жөн гана туура жолдо болгонуң үчүн сени араалашы ыктымалдан алыс эмес, Закария алейхиссаламды эстечи. Өз коомуңа канчалык жакшылык кааласаң да, алардын сага жамандык кылуудан токтобошу абдан жөнөкөй. Муса алейхиссаламга болгон зулумдуктарды эсте.

Сенин канчалык чынчыл жана адал экениңди биле туруп, атаңдын бир тууганы эң чоң душманга айланышы мүмкүн! Абу Лахаб ким эле, акыры?

Бирок чындыктын кереметтүү касиеттери бар: бутпарас эмес, бут жасоочунун уулунан пайгамбар чыккан, Ибрахим алейхиссаламга кара!

Атүгүл уулуң башын мизге тосот, Исмаил алейхиссаламдай!

Залымдардын жазасын бешикте дарыяда агып, кийин кекечтенген бир наристе чоңойгондо бере алат – Муса алейхиссаламдын кыссасы эсиңдеби?

Чындыктан тартынбасаң, аялың сага жанын пида кылып, коомдун эң күчтүүлөрү да сага дос болушат. Хадича, Умар, Хамза, Халид ибн Валид (Алла алардан ыраазы болсун) жашоолоруна көз сал!

Чындыкты таптыңбы, жоомарт бол, мээримдүү бол жана жүрөгүңдү жалгыз Хакка тапшыр. Хактан башкага жүрөктү байлаба. Хак үчүн сүй, Хак үчүн жек көр, Хак үчүн жаша. Хакта жүргөндөр үчүн жаныңды кыйна, чындыктан ким чыкса, түбөлүккө жүз үйрү, ишен, бир кылча да азап тартпайсың.

Акром МАЛИК