Баҳои ҳақиқат

Медонӣ, ки ин дунё аз дурӯғ лабрез аст? Зеро дурӯғ ширин аст. Ҳақиқат – талх. Дурӯғ талаби нафс аст, ҳақиқат талаби Ҳақ.

Банда ба дунё барои дӯст доштани Ҳақ омад. Ба сӯи Ҳақ бошад, бо ҳақиқат мераванд. Вале чӣ гуна ки ба маъшуқ расидан ҳамеша душвор аст, дар роҳи ҳақиқат рафтан низ пурмашаққат аст. Баҳои ҳақиқат гарон аст.

Дар ин роҳ чӣ баҳое ҳаст? Писар метавонад бар падари дар роҳи ҳақ буда исён карда, бародарашро бикушад. Агар чунин намебуд, магар Қобил Ҳобилро мекушт? Зану фарзандат метавонанд ба туғён рафта, ҳалок шаванд, агар чунин намебуд, магар зан ва писари Нӯҳ алайҳиссалом ҳалок мешуданд?

Зане, ки ба қавми палидаш муҳаббат дорад, ҳақ будани шавҳарашро дониста ҳам, метавонад палидиро дӯст доштанро идома диҳад, вагарна, магар зани Лут алайҳиссалом барои ҳалокати қабилаи ба палидӣ ғарқгаштааш оҳ мекашид?

Аз эҳтимол дур нест, ки танҳо барои дар роҳи рост буданат туро арра кунанд, Закариё алайҳиссаломро ба ёд ор. Ҳар қадар ки ба қавми худ некӣ хоҳӣ, бисёр одист, ки онҳо аз бадӣ кардан ба ту бознаистанд. Зулмҳоеро, ки ба Мӯсо алайҳиссалом шуданд, ба ёд ор.

Бо он ки медонад чӣ қадар ростгӯ ва ҳалол ҳастӣ, амакат метавонад ба бузургтарин душман табдил ёбад! Охир, Абӯлаҳаб кӣ буд?

Аммо ҳақиқат хосиятҳои аҷибе дорад, ки аз писари на бутпараст, балки бутсоз пайғамбар баромад, ба Иброҳим алайҳиссалом бингар!

Ҳатто писарат сарашро ба теғ медиҳад, мисли Исмоил алайҳиссалом!

Ҷазои золимонро кӯдаке, ки дар гаҳвора дар дарё шино карда, баъд забонаш гирифта шуд, пас аз калон шудан дода метавонад – қиссаи Мӯсо алайҳиссалом дар ёдат ҳаст?

Агар аз ҳақиқат натарсӣ, занат ҷонашро барои ту фидо мекунад ва ҳатто тавонотарини қавм низ ба ту дӯст мешаванд. Ба зиндагии Хадиҷа, Умар, Ҳамза, Холид ибни Валид разияллоҳу анҳум назар афкан!

Ҳақиқатро ёфтӣ, ҳимматманд бош, пурмуҳаббат бош ва дилатро танҳо ба Ҳақ супор. Ба ғайр аз Ҳақ дил мабанд. Барои Ҳақ дӯст дор, барои Ҳақ нафрат кун, барои Ҳақ зиндагӣ кун. Барои онҳое, ки дар роҳи Ҳақ мераванд, ҷонатро ба азоб андоз, ҳар кӣ аз ҳақиқат барояд, абадан аз ӯ рӯй гардон, бовар кун, зарра ҳам изтироб намекашӣ.

Акром МАЛИК