ЖЕТИНЧИ БАП

ЖЕТИНЧИ БАП

ЭР-АЯЛ

Биринчи бөлүм

Чымылдык жана назик маселелер

Оңой акча тапкысы келген жана ыйбаа, абийир, уятты жыйыштырып койгон адамдар үчүн бүгүн эр-аялдардын назик мамилелери жакшы чийки зат болуп турат. Көзү жаңы-жаңы ачылып, мындай иштерди али түшүнбөгөн жаш жигит-кыздар үчүн ар кандай формада базар ачышууда. Кудай ырайымы чексиз жана адилеттүү Зат болгондуктан, адамзаттын дээрлик жүз пайызын бул маселеде дени сак жараткан. Ошондой эле Парвардигер ыйбаа ээси болгондуктан, бул иштерди жашыруун тутууну буйруган. Назик мамилелерде адамзаттын жаныбарлык табияты үстөмдүк кылгандыктан, бул иштер нике менен корголуп, парда артында сакталып келген. Максат — адамзат адамгерчилик даражасынан жаныбарлык зынданына кулабасын. Адамзат жер жүзүнө жалаң гана жыныстык катнаш үчүн эмес, башка жогорку максаттар үчүн келген. Жыныстык катнаш көңүл менен ынтаанын чоң бөлүгү жумшалышы мүмкүн болбогон иштердин катарына кирет. Шаһватка болгон кулчулуктан улам өспүрүм жигит-кыздарда бул иштерге кызыгуу жогору. Анткени аларда акыл али толук калыптана элек. Алар жашыруун түрдө буга тиешелүү уятсыз видеолорду, сүрөттөрдү көрүшөт, китептерди жана макалаларды окушат, өз ара сүйлөшүшөт, жасалма жол менен урук төгүшөт жана ушул сыяктуу күнөөлөрдү кылышат. Билүү керек: мындай иштер ар бир адам үчүн абдан оңой. Ушунчалык оңой болгондуктан, бул жөнүндө катуу ойлонуунун кереги жок. Демек, кандайдыр бир китептерди, макалаларды окуп, кимдир бирөөлөрдөн сурап, ар кандай балээ видеолорду көрүп жүрүүнүн такыр кереги жок. Келин-күйөө убакыт өткөн сайын акырындап бири-бирин түшүнүп алышат, алсыздык жана ушул сыяктуу ар кандай маселелердеги тынчсыздануулар негизсиз. Ким бул тууралуу көп сүйлөсө, шаһват козгоочу дарылары үчүн кардар издеп жүрөт, ошондой эле бул темада керексиз сандырактагандар — ыйбаасыз, адепсиз адамдар. Чымылдык — эски салттардын бири. Биринчи түнү кандай болуу керектигин акылдуу адамдар токтоо түрдө айтып беришсе, жетиштүү. Гусул, тазалык жана ушуга окшош илимдерди үйрөнүү жетиштүү. Эң негизгиси, youtube, telegram сыяктуу тармактарда адам чогултуп, ушул аркылуу акча таап бала баккан уятсыз жана ыйбаасын саткандардын бир да сөзүнө кулак салбаңыз, бул жагынан эч кандай жасалма каражат да керек эмес. Кандайдыр бир көйгөй бардай сезилсе, билиңиз, ал жөн гана сезилип жатат. Чынында көйгөй жок. Баары өз нугуна түшүп кетет, шашуунун, кысылуунун жана тынчсыздануунун кереги жок. Жана эң улуу насаат: эр менен аял эч качан өз ара назик мамилелерин эч кимге айтпасын! Башкалардын да бул жөнүндөгү сөздөрүнө кулак салбасын! Мындай темаларда сүйлө деп кызыктыргандар — иблис жана анын адам кейпиндеги малайлары.

Акром МАЛИК