Инна лиллаҳи ва инна илайҳи рожиун.

Ассалому алайкум!

Инна лиллаҳи ва инна илайҳи рожиун.

Имом Бухорий номидаги Халқаро илмий тадқиқот марказида Йўлдошхон Исаев домла ишлар эдилар.

Ўта камтар, самимий, киришимли, кибрдан мутлақо йироқ, хокисор ва гўзал хулқли инсон эдилар.

У киши билан бир марта марказга борганда кўришганман.

Бир неча марта телефонда гаплашганман.

Туркиядаги Тўпқопи музей-кутубхонасига онлайн аъзо бўлолмаган эдим, ариза тўлдирганман-у, қабул қилишмаётган эди. Борганимда Йўлдошхон акага гапдан гап чиқиб айтдим. Дарҳол қўнғироқ қилдилар. Ўша ерда Сарро деган қиз ишларкан, шу ондаёқ у орқали мени кутубхонага онлайн аъзоликка тасдиқлатдилар.

Жуда ҳайрон қолдим: наҳотки, шундай oson ва беғараз яхшилик қиладиган одамлар борми дея.

Чунки вақт ўтгани сайин бундай яхшилик қиладиганлар ҳаддан ташқари камайиб кетаётгани сабабли ҳеч кимдан бирор яхшилик кутмай қўйган эдим. Ҳатто дунёда бирор одам холис яхшилик қилишга қодир бўлмай қоляпти деган тушкун ўй ғолиб бўла бошлаган эди менда.

Балки шу тариқа инсонлар бир-бирларининг холис яхшилик қилишларига ишонмай қўйишса керак.

Домла билан яқинман, қадрдонман деб айта олмайман.

У киши ҳамма қатори менга шунчаки яхшилик қилиб кетдилар деб ўйлайман.

Эсларидан ҳам чиқиб кетгандир.

Бугун эшитиб қалбим маҳзун бўлди: Домла Йўлдошхон Исаев боқий дунёга кетибдилар.

Аллоҳим раҳматига олсин.

Хулқда, камтарликда, хокисорликда, ҳеч нарсага даъво қилмасликда Йўлдошхон акага ўхшашни орзу қиламан.

Роббим, бир гўзал хулқли, ерни ҳам озорламай дея эҳтиёт бўлиб босиб ўтган мўмин бандангни қабул эт ва гўзал муомала қил!

Гуноҳларини кечир ва раҳматинг билан ўраб ол!

Омин, я Роббал оламийн!

Илдирма:

Домланинг қисқа дақиқалик нутқлари:

https://www.youtube.com/watch?v=eNFJVwXHD-0