Ассалому алейкум!

Ассалому алейкум!

Инна лиллахи ва инна илайхи ражиун.

Имам Бухари атындагы Эл аралык илимий изилдөө борборунда Йолдошхон Исаев домла иштечү.

Абдан кичи пейил, ак ниет, кишиге тез аралашкан, текеберликтен таптакыр алыс, момун жана көркөм мүнөздүү инсан эле.

Ал киши менен бир жолу борборго барганда жолукканмын.

Бир нече жолу телефон аркылуу сүйлөшкөнмүн.

Түркиядагы Топкапы музей-китепканасына онлайн мүчө боло албай жүргөм, арыз толтургам, бирок кабыл алышпай жаткан. Барганымда сөз арасында Йолдошхон байкеге айтып калдым. Дароо телефон чалды. Ошол жерде Сарра деген кыз иштейт экен, ошол замат ал аркылуу мени китепканага онлайн мүчөлүккө бекиттирип берди.

Аябай таң калдым: ушунчалык оңой жана кызыкчылыксыз жакшылык кыла турган адамдар чын эле барбы деп.

Анткени убакыт өткөн сайын мындай жакшылык кылгандар ашкере азайып баратканы үчүн эч кимден эч кандай жакшылык күтпөй калган элем. Атүгүл дүйнөдө бир да адам калыс жакшылык кылууга жөндөмсүз болуп баратат деген түңүлүңкү ой менде үстөмдүк кыла баштаган эле.

Балким, ушундайча адамдар бири-биринин калыс жакшылык кылаарына ишенбей калышса керек.

Домла менен жакынмын, сырдашмын деп айта албайм.

Ал киши баарына кылгандай эле мага жөн гана жакшылык кылып кетти деп ойлойм.

Эсинен да чыгып кеткендир.

Бүгүн угуп, жүрөгүм муңайды: Домла Йолдошхон Исаев түбөлүк дүйнөгө кетиптир.

Аллам ырайымына алсын.

Мүнөздө, кичи пейилдикте, момундукта, эч нерсеге доомат кылбаганда Йолдошхон байкеге окшош болууну самайм.

Раббим, көркөм мүнөздүү, жерди да оорутпайын деп этият басып өткөн момун пендеңди кабыл кыл жана ага көркөм мамиле кыл!

Күнөөлөрүн кечир жана ырайымың менен ороп ал!

Оомийин, йа Раббал аламийн!

Эскертме:

Домланын бир нече мүнөттүк кыска сөздөрү:

https://www.youtube.com/watch?v=eNFJVwXHD-0