Нимадир бизга етмаётгандек.

Нимадир бизга етмаётгандек. Нимадир биздан қочяпти ва уни тутиб олиш учун шошяпмиз. Аслида, ҳаммаси жойида, ҳаммаси мувозанатда – ниятимизга лойиқ ҳаракатдамиз. Ҳаракатга лойиқ барака келяпти. Гуноҳларимиз тўсиқ бўлиб, йўлимизни тўсяпти, истиғфор ва хайр амалларимиз бу тўсиқларни йиқитмоқда. Қалбимизда Худога қанчалик синиб ёлворсак, ҳаётимиздаги мушкуллар шунчалик ечилмоқда. Фақат биз шошяпмиз. Фақат биз беҳуда чиранмоқдамиз. Ризқ ва насиба Худонинг ихтиёрида бўлгани ҳолда кўнмаяпмиз. Ҳеч нарсанинг эрта ё кечи йўқ: ҳаммаси ўз вақтида содир бўлади, ишни бузса, банданинг шошқалоқлиги бузади. Қулдан талаб этилгани: яхши ният, гуноҳларга тавба, оғриқларга сабр, неъматларга шукур ва Худога ибодат ва зикр. Оламни тарбият қилиб турган Зотни танисанг, қаерга шошасан ва нима учун тоқатсиз бўласан? Сабрсизлигимиз ва жаҳолатимиз, ғафлатимиз ва касофатимиз учун бизни афв қил, Худойим!