Ёшларни тоза ва покиза бўлади деб билардим. Кейин маълум бўлдики, ёшлар орасида ҳам айёр, иккиюзламачилари…

Ёшларни тоза ва покиза бўлади деб билардим. Кейин маълум бўлдики, ёшлар орасида ҳам айёр, иккиюзламачилари кўп экан. Сенга яхши муомала қилиб, ота-онасига адабсизлик қилувчилари бор экан. Булар хоиндирлар. Сенга фақат ишини битириб берадиган восита деб қарайдиганлари кўп экан. Булар тубандирлар. Сенга ўзини бечора кўрсатиб, ортингдан ёмон сўзларни тарқатадиганлари ҳам бисёр экан. Улар хордирлар. Инсон ҳаёти тамалини – пойдеворини йигитликда қўяди. Йигитлигингни тубанлик, иккиюзламачилик, чидамсизлик, хиёнат, аҳмоқлик, дунёпарастлик, мунофиқлик, шаҳватпарастлик, такаббурлик билан ўтказаркансан, сени келажакда ана шу жирканчликларнинг ҳосили кутиб туради. Истасанг ҳам, истамасанг ҳам, ейсан. Ёшликни матонат, ҳалоллик, поклик, садоқат, меҳнат, сабот, муҳаббат, интилиш, ростгўйлик, сабр, ибодат билан зийнатласанг, сени келажакда иззат ва шараф кутмоқда. Йигитнинг қилаётган иши – зоти ва наслининг кўзгуси. У зотидаги ҳамма иллат ва фазилатни фош қилиб яшайди. Бошқача бўлиши имконсиз. Албатта, тавба ва tavfiq эшиги очиқ, унга ҳам зоти ва наслида яхшилик борлар муваффақ бўлажаклар.