Ібілістің сипаттарының бірі — торығушылығы. Яғни ібіліс — торығушы әрі мұңлы. Ол Құдайдан үміт үзген және…

Ібілістің сипаттарының бірі — торығушылығы. Яғни ібіліс — торығушы әрі мұңлы. Ол Құдайдан үміт үзген және тозаққа разы болған мақұлық саналады. Маған бәрібір деген ой — соныкі. Дәл ібіліс жолдан тайдырған адамда торығу мен түңілу үстем болады. Торыққан адам ертеңнен жарық көрмейді. Барлық оқиғалардан тек қасірет пен азап іздейді. Ал үмітті адам әрдайым жеңілдік пен қуаныш, шаттық пен рахат үстінде болады. Адамның торыққан емес, көтеріңкі көңілді болуы Құдайға ұнайды. Патшаға одан үміттенетіндер ұнайды, үміт үзгендер емес. Кез келген жағдайдан қалай жақсылық таба аламыз? Ауру келсе, дұға жасауға жағдай туғанына қуануға болады, өйткені науқастың дұғасы қабыл. Қол астындағылардың бой бермеуі орын алса, бұдан жүрек ауырса, күнәлардың кәффараты туралы ойлауға болады. Жақындар, достар тастап кетсе, опасыздық жасаса, олардың шын болмысы ашылғанына, опасыздарды бауырға басудан құтылғанына адам шүкір етсе, лайық; сондай-ақ, олардан жиіркенбей, бұрын да, қазір де танымайтын миллиондаған адамдардың арасына қосып жіберу керек — мұндай адам маған бөтен деген ойға келу және еске алмау, мүлдем ұмыту қажет. Ризықтан қиындық сезсе, ризыққа Құдайым кепіл деп шын жүректен дұға етіп, жол көрсет деп жалбарыну қажет. Әдетте, парасатсыздарға, арсыздар мен надандарға кезігуге болады, оларды ғайбаттамау, керісінше, олардан алыс тұру арқылы өзін сақтау және оларға мейірім көзімен қарау керек. Адам өзін біреулерден жоғары қоймаса, алаңсыз өмір сүреді. Баратын мекенін есіне алып жүрсе, тыныш жүреді. Ең бастысы, көп сөйлеуден өзін тыйса, өмірі өте бейбіт өтеді. Адам бәлкім үлкен күнәлар жасаған шығар. Оларды есіне алса, дүние көзіне қараңғы болар — дереу истиғфар мен тәубе ету және сол сәтте жүрегінің түкпірінен осы сөздерді айту жақсы, рух жеңілдейді, қателер тас сияқты қараңғылық батпағына батырмайды. Өмірде бәрі оңай; әлеуметтік желіде біз адамдардың бір сәтін ғана көреміз, олар да қайғы шегеді; оларда да ауыртпалық көп; олардың көрсетпелері, зер салып қараса, өте күлкілі. Оңашада адал ризықпен, адал адамдармен бірге рахат сезініп өмір сүру — көркем. Терең дария сияқты тыныштық орасан қуат береді, мен алаңсызбын деп мақтанбау — жақсы белгі. Адамдарға, жануарларға мейірім көзімен қарау; надандардың азарын жүрекке кіргізбеу; жүрегі қатқандардың ортасынан алысқа қашу; адамдарды сөкпеу — жан тыныштығының кілті. Ешкімге жабысып алмаған ұтады — қалғысы келген қалсын, қаламаған кетсін. Қалғандарға қамқор бол, кеткендерді ұмытуға тырыс. Өмір өте жақсы, өмір сүру — өте орынды іс. Әлемде күнә көбейді деп уайымдаған адам өзін түзесін, күнәлардан сақтансын, Құдайға жылап жалбарынсын, осы жеткілікті. Халық үшін дұға ету, қайырлы амалдарымен мақтанбау, мен, мен, мен деп өзін көрсетпеу — көркем мінез. Айтпақшы, жұмыс-жұмыс-жұмыс деп құл болмаған адам — азат. Азат, еркін адам күннің бір бөлігінде жұмыс істейді, бір бөлігінде демалады, бір бөлігінде ғибадат етеді. Жұмыстан мақсат — жай ғана ризыққа себеп жасау, жұмыс деп біреуге немесе жұмыстың өзіне құл болу емес. Адамдар бізге көңіл бөлмесе, не болды? Міндетті емес. Көмек бермесе, не болды? Міндетті емес. Біз көңіл бөлсек, көмек берсек, жеткілікті. Өмірден тәлім алмаған және тәлімге мұқтаждық сезбеген кісіге насихат — саңырау құлаққа домбыра шерту ғой. Баршамызға үміттілік, кеңпейілділік, күлкі, махаббат жар болсын! Жұма мүбәрак, қымбаттыларым!