АНА ӨЗ ҚЫЗЫНЫҢ БАҚЫТТЫ БОЛУЫНА ҚАЛАЙ ҮЛЕС ҚОСА АЛАДЫ?

АНА ӨЗ ҚЫЗЫНЫҢ БАҚЫТТЫ БОЛУЫНА ҚАЛАЙ ҮЛЕС ҚОСА АЛАДЫ?

Әйелдің бақыты тек отбасымен ғана толық. Отбасы жоқ әйелдің бақыты кем. Тіпті оның жүрегі қатты жаралы болады. Ал отбасының тірегі — ер. Ері жоқ шаңырақ күнсіз аспан, айсыз түн сияқты. Ер — отбасының басы, жол бастаушысы. Оны ренжітуге, қорлауға, сөзін жығуға, басын игізуге, жүрегін ауыртуға болмайды.

Халық бекер «Ерді ер қылатын да әйел, қара жер қылатын да әйел» демеген. Бұл мақалда әйелге өте үлкен күш телініп отыр.

Ана — өз қызының бақыты үшін ең үлкен істі атқаратын жан:

1. Ибалы етіп тәрбиелейді. 2. Үй шаруасына епті әрі іскер етіп өсіреді. 3. Күйеуіне тәтті сөзді әрі зерделі, сабырлы әрі мойынсұнғыш болуды бойына сіңіреді. 4. Ақылды болуға — пайда мен зиянды айырып, пайда жақта тұруға үйретеді. Пайда — бұл иман мен әдепті сақтап қалу.

Бұл істер қыз тұрмысқа шыққанша болады. Бірақ ананың міндеті мұнымен бітпейді, қызының бақыт сарайын тұрғызуда, нығайтуда жалғаса береді:

1. Қызына күйеуін жамандамауды, күйеуінің сырын сатпауды үйретеді. 2. Енеге ренжімеу және қайын атаның көзіне тік қарамау тәлімін береді.

Ең бастысы -

анда-санда күйеу баласының өзінен қызына білдірмей, шын көңілмен сұрайды: «Қызымда қандай кемшіліктер бар? Өзін қалай ұстап жүр? Мінезі бұзылып жатқан жоқ па? Жалқаулық танытып жүрген жоқ па? Сіз айтыңыз, мен насихат айтамын, иншаАлла!»

Күйеу бала үшін ене анадай.

Ал ана — ең жақын дос. Анаға кейбір сырларды айтуға болады. Әсіресе, әйеліңе тәрбие беруге әзір, мәрт әрі ақылды енеңе кейбір ойларыңды айтсаң, ол қызына насихат айтса, қыз, әрине, ана сөзін алады.

Осылайша отбасы қамалы берік тұрады. Амандық пен береке, бақыт пен қуаныш бұл қамал иелерін тастап кетпейді, Құдай қаласа.

Көрдіңіз бе, ана (әйел) отбасы үшін қаншалықты маңызды және оның орнын ешкім баса алмайды!