ЭНЕ ӨЗ КЫЗЫНЫН БАКТЫЛУУ БОЛУШУ ҮЧҮН КАНДАЙ САЛЫМ КОШО АЛАТ?

ЭНЕ ӨЗ КЫЗЫНЫН БАКТЫЛУУ БОЛУШУ ҮЧҮН КАНДАЙ САЛЫМ КОШО АЛАТ?

Аялдын бакыты үй-бүлөсү менен гана толук. Үй-бүлөсү жок аялдын бакыты кем. Атүгүл анын жүрөгү абдан сынык болот. Үй-бүлөнүн тиреги болсо — эр. Эри жок үй күнү жок асман, айы жок түн сыяктуу. Эр — үй-бүлөнүн башчысы, жол башчысы. Аны таарынтууга, кордоого, сөзүн сындырууга, башын ийдирүүгө, жүрөгүн оорутууга болбойт.

Эл бекеринен «Эрди эр кылган да катын, кара жер кылган да катын» деп айтпаган. Бул макалда аялга абдан чоң күч ыйгарылып жатат.

Эне — өз кызынын бакыты үчүн эң чоң ишти кыла турган зат:

1. Абийирдүү кылып тарбиялайт. 2. Үй тиричилигинин иштерине эпчил жана шамдагай кылып өстүрөт. 3. Күйөөсүнө таттуу сөздүү жана түшүнүктүү, сабырдуу жана моюн сунуучу болууну сиңирет. 4. Акылман болууга - пайда менен зыянды айырмалап, пайда тарапта турууга үйрөтөт. Пайда — бул ыйман менен адепти сактап калуу.

Бул иштер кыз турмушка чыкканга чейин болот. Бирок эненин милдети муну менен бүтпөйт, кызынын бакыт сарайын курууда, бекемдөөдө уланат:

1. Кызына күйөөсүн жамандабоону, күйөөсүнүн сырын сатпоону үйрөтөт. 2. Кайненеден таарынбоону жана кайатанын көзүнө тике карабоону үйрөтөт.

Эң негизгиси -

анда-санда күйөө баласынан кызына билдирбей, чын ыкластан сурайт: «Кызымда кандай кемчиликтер бар? Өзүн кандай алып жүрөт? Мүнөзү бузулган жокпу? Жалкоолук кылбай жатабы? Сиз айтыңыз, мен насаат кылам, иншаАллах!»

Күйөө бала үчүн кайнене энедей.

Эне болсо — эң жакын дос. Энеге айрым сырларды айтууга болот. Өзгөчө, аялыңа тарбия берүүгө даяр, март жана акылман кайненеңе айрым ойлоруңду айтсаң, ал кызына насаат кылса, кыз, албетте, эненин сөзүн угат.

Ушундайча үй-бүлө чеби бекем турат. Саламаттык жана береке, бакыт жана кубаныч бул чептин элин таштабайт, Кудай кааласа.

Көрдүңүзбү, эне (аял) үй-бүлө үчүн канчалык маанилүү жана анын ордун эч ким баса албайт!