3-бөлүк

3-бөлүк

Бул мурид башка тилектештерин чогултуп, Кустантинияга барды. Анан баары бир болуп, жамаат болуп, Кудайга жалына башташты: зикир-тилаваттарды, истигфар-салаваттарды айтып, устаздарына Хак Тааланын туура жол беришин ыйлап сурашты. Бул түрдөгү ибадат бир топ убакыт уланды. Бир күнү шейхтин халифасы, башкача айтканда, ошол шакирт түш көрдү: түшүндө Расулуллах саллаллаху алейхи ва саллам келип, айттылар: «Эй үммөтүм! Сенин дубаларыңды Кудай кабыл кылды. Дал сенин ыкласың жана мухаббатың себептүү Кудай пириңе туура жол берди, ага акыл-эси кайтты!»

Мурид кубанып, ыйлап ойгонду. Сахар убагы экен.

Чынында эле, шейх Санъан ушул убакта эсине келип, ыйлап тообо кылып жаткан эле. Шакирттер аны издеп барышты жана устаз менен көрүшүштү. Баары ыйлашты, эч кимдин тили сөзгө келбей жатты.

Шейх гусул алды, калимаи шахадатты айтып, кайра динге кирди; селде жана чапандарын кийип, Меккеге кайтты.

Ошол күнү христиан кыз түш көрдү: Иса алейхиссалам ага айттылар: «Сенин алдыңа бир валийуллах келген эле го? Эмне үчүн аны ушунча кордодуң? Тез арада изинен бар жана анын динине кир!»

Христиан кыз ойгонду да, атасынын бир атына минип, караңгыда желип кетти.

Жарым жолдо шейх Санъанга жетти, кылган иштерине ыйлап тообо кылды жана шейхтин колунда шахадат калимасын айтып, динге кирди жана ошол замат ыйман келтиргенден кийин жаны үзүлдү.

Шейх ага жаназа окуп, топуракка койду, Меккеге кайтып, өмүрүнүн аягына чейин иршад жана даават менен алек болду.

Бул окуя символ жана маанилерге толуп-ташкан. Айрымдарын келтиребиз: 1. Ышктын кубаты ушунчалык, ага каршы тура ала турган эч бир күч ааламда жок. 2. Ышкты пенде заты дарылоого кудуретсиз, ал ээсин бардык нерседен ажыратат, ар-намыс, кадыр-барк ышктын алдында эч нерсе эмес. 3. Эч ким, кайсы даражада болбосун, кыйроодон аман эмес, эч кимдин ыйманы кепилденген эмес. 4. Устаз-шакирт, пир-мурид ортосунда берилгендик жана опа болушу керек. Кудай дубалар жана ыклас себептүү ар кимге куткарылуу берет. Чыныгы опасы барлар гана өз досторун дуба менен жийиркеничтүүлүк кудуктарынан куткара алышат. 5. Тоободон кийин эч ким өткөн күнөөлөрүн эч кимге эскертүүгө акысы жок. Тескерисинче, тообо адамды мурунку ордуна, балким андан да бийик даражага кайтарат. 6. Пендеге болгон ышкта эсин жоготкон ашык Кудайдын жолунда мындан да күчтүүрөөк түрдө курмандыкка даяр болот.

Ышк — адам үчүн куткарылуу жолу. Ал сырткы жактан адамды кыйратат, бирок кайра курат, кашф жана жакындыкты ал орнотот. Ышк — кыйратуучу жана коркунучтуу өрөөн, ага кирүүнүн жана анда жүрүүнүн акыбети эч кимге белгисиз.

Анткени, ар бир ашык шейх Санъан аталбагандай эле, анын акысына ыклас менен дуба кылуучусу бар экени да айтылган эмес.

Бул окуя ышктын эмне экенин көрсөткөн окуя эле.

Бүттү.