Айлык берүүнүн хикматы жөнүндө айрым чындыктардан сүйлөсөк, пайдалуу болсо, ажеп эмес, иншаАллах.

Айлык берүүнүн хикматы жөнүндө айрым чындыктардан сүйлөсөк, пайдалуу болсо, ажеп эмес, иншаАллах. Жетекчи, ал кандай жерде болбосун, кызматкерлердин маанайын жана мүнөзүн билип турушу керек. Башкача айтканда, мамиле жана буйруктар ушуга ылайык болушу зарыл. Жаңы, башкача айтканда, тажрыйбасы аз же тажрыйбасы жок жаш жумушчуларга алты ай өтпөй туруп жогору өлчөмдө айлык берүүгө болбойт. Себептери төмөнкүлөр: 1. Жаштардын көпчүлүгүндө акча коротуу илими жок. Башкача айтканда, алар акчаны керектүү жерге коротууну билишпейт, алар акчаны керексиз кумарларга чачышат. Аларга бериле турган айлык эмгек акы да ушундайча ысырап болуп кетет. 2. Акча коротуу илими билим менен бирге тажрыйба аркылуу пайда болот. Башкача айтканда, акчасын ойлобой короткон жаш короз эртең муктаждыкка кабылып, башы дубалга урулгандан кийин: «Эээ, акчаны бир аз ойлонуп, айлана-тегерегиме карап коротушум керек экен го!» — деп жыйынтык чыгарат жана акчаны эң зарыл жерлерге жумшоону үйрөнөт. Айлыгы азыраак болсо, бул маселеде үнөмдүүлүк чеберчилиги артат. 3. Белгилүү убакыт бою муктаждык адам үчүн зарыл. Муктаждык — өсүштүн фактору. Муктаждык акылдуу адам үчүн хикмат жана күч булагы. Башкача айтканда, акылдуу жигит муктаждык аркылуу муктаждыктын себептерин үйрөнөт, ага кабылбоонун чараларын түшүнөт, муктаждарды сезет, муктаждарга кантип жана кандай түрдө жардам берүү керектиги жөнүндө практикалык илим алат. 4. Азыраак айлык алып иштеп жаткан жигит сабыр жана берилгендик жаатында сыноодон өтөт. Ал башчынын хикматына жана мээримине, адилеттигине жана тажрыйбасына ишенет, жетишпестиктерге сабыр кылып, берилгендик менен өз ишканасына жана жетекчисине кызмат кылат, бул болсо анын ийгилиги үчүн, ишенимге кирип, чоң кызматтарды аткарышы, акыры береке жана жакшы ийгилиги үчүн жол ачат. 5. Акчасы аз адам узак мөөнөт ушул абалда калып, акчанын аздыгы анын жашоосу үчүн кыйынчылык жаратпай турганын түшүнөт. Айрым нерселердин жоктугу жашоого чекит койбой турганын түшүнүп жыйынтык чыгарат. Акча бардык нерсени чечпей турганын түшүнөт. Акча ал каалаган убакта өзүнөн-өзү эмес, эмгек, тажрыйба, кайрат жана сабыр аркылуу Кудай ыраа көргөн убакта келерин терең түшүнөт. 6. Жаш жумушчу ишканада иштеп жүрүп, адегенде өз тармагында практикадан өтөт, башкача айтканда, алгачкы мезгилде эң маанилүү тажрыйбаларды жана билимдерди, чеберчилик менен көндүмдөрдү алат, бул жагынан ага ишкана — мектеп, башчы — устат милдетин аткарат, ал бир аз айлык алып, көп иштөө менен ушул мектептин жана устаттын акысын өтөйт. 7. Жаш жумушчу көп иштеп, аз айлык алып, фидайылыкка жана туруктуулукка жетет, адал эмгектин маңызын түшүнөт, келечектеги береке дал ушул адал тер менен пайда болот, жаш жумушчу эмгектен келген ырыскынын канчалык таттуу жана баалуу болорун бүт жан-дили менен сезет. Жалпысынан алганда, бул маселеде көптөгөн хикматтар бар, ошондуктан урматтуу жигиттерибиз, өз ордумду таппадым, өсүшүм керек деп жумуштан жумушка секириши туура эмес, бул аларга «туруксуз» деген энбелги жабыштырат; эгер башчы инсаптуу, ыймандуу, адал болсо; ишкана адамдарга пайдалуу кызмат кылып жатса, пайдалуу азыктарды берип жатса, демек, ушул жерде калуу керек, болгону бул нерселерди жумушка кирүүдөн мурда билип, шектенүүлөрдөн арылуу талап кылынат. Бул илимди толук билип алыңыз, өзүңүзгө терең сиңириңиз, бул сөз башчыларга да, кызматкерлерге да тиешелүү. ИншаАллах, пайдасын көрөсүз. Мына ушул илим болбогондуктан жумушчуларда туруктуулук жок, жетекчилер кыйналган, иштейм деген жаштар да машакат тарткан... Дагы алар интернетти толтурган «мотиватор акылмансымактардын» өсүү үчүн ыңгайлуу чөйрө изде деген куру сөзүнө жана көп сүйлөгөнүнө алданып жүрүшөт. Сөзүбүздү кыска кылдык, анткени бул жагынан кеңири китеп жазууга болот.