ТӨРТҮНЧҮ БАП

ТӨРТҮНЧҮ БАП

Экинчи бөлүм

Кыздарга кат

Кызым! Сен абдан назик, ийкемдүү жана алсыз жаралдың. Сенин кубатың жана урматың — ушул сыпаттарыңда. Сен сүйүктүү жана баалуу жаралдың, сага сүйүү баш ийүүңдөн, зирек акылыңдан жана таттуу сөздөрүңдөн келет. Кызым! Өзүңдү көрсөтүүгө шашпа, ар кандай жасалгаларга кумар болбо, курбуларыңа карап кызыгуу чынжырына байланба. Сен өзүң өзүнчө бир ааламсың, сен бир китепсиң, анын барактарын баарына ачып таштаба. Кызым! Эгер сен үй-бүлөнүн коргоосунан сыртка чыксаң, жумурткадан чыккан куштун балапаны кандай жылаңач болсо, ошондой жылаңач абалда каласың. Сен мени бөтөндөр коргойт деп ойлобо, ар кандай бөтөн адам бул суук дүйнөдө сага вахшат көзү менен карайт. Кызым! Билесиңби, сен канчалык сүйүүгө жана мээримге татыктуусуң! Сенин жүрөгүң канчалык сүйүү жана мээрим менен толуп-ташып турат! Жана өзүң канчалык сүйүүгө жана мээримге муктажсың! Сенин мээримиң болбосо, аалам кыраан чилдеде калат; сага мээрим берилбесе, сен гүлдүн бадалындай куурап каласың. Баарынын мээримин алам, баарынын сүйүүсүн ээлейм деп ойлобо, баарынын сүйүүсү жана мээрими — жок нерсе; баарыныкы болгон нерсе — ээси жок нерсе. Сен өзүңө тиешелүү адамдардын мээрими менен гана жашай аласың; сен өзүңө тиешелүү адамдарга гана мээрим берип, кимдерди болсо да жашата аласың. Сага тиешелүү адамдар — бул ата-энең; эже-сиңдилериң; ага-иниң…; жана Кудай бере турган өмүр жолдошуң — кожоюнуң. Анан балдарың. Алардан башка баары сага бөтөн, алардын эркеси — Сен. Алардын байлыгы — Сен. Сен үчүн да алар — сенин жашооңдун маңызы. Ошондуктан өзүңдү эч качан бөтөндөрдүн колуна жана назарына таштаба! Кызым! Жүрөгүңдө көрө албастык болбосун. Эже-сиңдилериңе көрө албастык кылба, аларга ак ниет жана мээримдүү бол. Сен үчүн жакын жана эң жакшы сырдаш — эже-сиңдилериң. Кызым! Сага кыска жана жөнөкөй сүйлөдүм. Бул сөздөрдү жаттап ал. Маанисин чак. Жана баркың канчалык бийик экенин унутпа. Сен жашоонун асыл маңызы, нуру жана тамырысың. Бүт аалам сага муктаж. Өзүңдү дайыма сакта. Таза атыңа душмандардын айласына алданып так түшүрбө, ал тактан кутулуу абдан кыйын. Аллага аманат бол, кызым!

Акром МАЛИК