Мо ҳам, ба гумонам, калон мешавем. Оҳиста-оҳиста ҷисм ҳам, рӯҳ ҳам гоҳо мехоҳад дар оғӯши оромӣ ором гирад.…

Мо ҳам, ба гумонам, калон мешавем. Оҳиста-оҳиста ҷисм ҳам, рӯҳ ҳам гоҳо мехоҳад дар оғӯши оромӣ ором гирад. Суҳбатҳои бе ғавғову даъво мехоҳад. Дар акси ҳол, борҳои ба чашм намоёну нонамоён, маълуму номаълум бар ин ҷисми заиф, бар рӯҳи ғариб вазнинӣ мекунанд. Ақле, ки мехоҳад барои дигарон раҳнамо бошад, машаққати ба роҳ овардани нафси худро мечашад. Дар ҳамин лаҳзаҳо сафар дар оғӯши табиат фоида медодааст. Ин на бо ақл, балки эҳтиёҷест, ки худ ба худ пайдо мешудааст. Пештар ҳам ба кӯҳ баромада будем, вале бо роҳбалад машаққати сафар осон мегузаштааст. Дар сафари @hamrohtrip, ки шиносу бародари хурдиамон Усмонҷон ташкил кард, ба мо роҳнамо шуд. Ба Чукурак, шаршараи Балтав (Болтоғ); Оби Раҳмат ва ғори Балтав рафтем. Тамоми рӯз пиёда роҳ гаштем. Офтобу шамол, сояи абрҳо ва харсангҳои кӯҳҳо ҳамроҳамон буданд. Дарвоқеъ, Балтав, ба фикрам, номи аслист. Русҳо онро «Палтау» гуфта, ба худ мувофиқ кардаанд. Аз талаффузи русӣ гузашта, агар Балтав гӯем, беҳтар аст, валлоҳу аълам.

Акром МАЛИК