Дар интернет фикреро шунидам, ки падар бояд бо писараш дӯст бошад. Фикри қатъиян нодуруст.

Дар интернет фикреро шунидам, ки падар бояд бо писараш дӯст бошад. Фикри қатъиян нодуруст. 1. Барои инсон аз падар наздиктар дӯсте нест. Падар маҷбур нест, ки инро изҳор кунад ва ошкор созад. 2. Мақоми падар бузург аст, ӯ ниёз надорад, ки ба кӯдаке, ки аз пушти ӯст, дӯстии худро изҳор кунад. Зарарҳои он ки падар ба фарзандаш «ман дӯсти туам, туро дӯст медорам» гӯяд: 1. Ҳайбати падар меравад. 2. Кӯдак падарро на қавӣ ва пурасрор, балки оддӣ ва заиф дониста, ба ӯ такя карда наметавонад. 3. Кӯдак ба ҳар ҳол бо дигарон дӯстӣ пайдо мекунад, зеро дӯстӣ баробариро тақозо мекунад. Падар ва фарзанд баробар намешаванд. Падар бояд мувофиқи номаш ПАДАР боқӣ монад. Барои ин корҳое, ки ӯ мекунад: 1. Назорат. Кӯдак ҳамеша назоратро ҳис кунад. Худсар ва худрой набошад. 2. Падар дар ғазаб аз ҳад нагузарад. Агар кӯдак хато кунад, ду бор бахшида шудан ва бори сеюм ҳатман ҷазо дода шудан ШАРТ аст. Барои ин кӯдак бояд пешакӣ огоҳ карда шавад, баъд фаҳмонда шавад, ки кораш айб аст. 3. Насиҳат. Хоҳ ба кӯдак писанд ояд, хоҳ не, ба ӯ доимо дар фосилаҳои муайян насиҳат карда истодан шарт аст. Танҳо насиҳат ба ғур-ғури малолатовар табдил наёбад. Ҳаётӣ, зинда, ҷолиб. 4. Ба кӯдак аз 6 то 10-солагӣ илм деҳ. Ин илми навиштан, хондан, ҳисоб, шинохтани Худост. Дар ин давра барои кӯдак соати бозӣ бояд бошад. Ҳар рӯз 1– 2 соат. Дар рӯзҳои муайян бештар. 5. Аз 10-солагӣ ҳунар омӯхтан лозим аст. Косибӣ, таъмиркорӣ ва монанди инҳо. 6. Аз 16-солагӣ сар карда, дар баъзе масъалаҳо фикрашро пурсидан, агар хато бошад, ислоҳ кардан, дурустҳояшро қабул кардан лозим аст. 7. Аз 6 – 7-солагии кӯдак барояш устоди боэътимод ёфтан лозим аст. Ӯ бояд илмеро диҳад, ки таҳсилаш дуру дароз давом мекунад, дар ин раванд ба тарбия саҳм гузорад. Устод ҳатман бояд инсони ҳалол, покиза, аз озмоишҳо гузашта, оиладор, дар оилааш мушкиле надошта ва насабаш нек бошад — ШАРТ. 8. Аз 17-солагӣ писарро ба ошҳои маҳалла ҳамроҳ бурдан, корҳои муҳимро бо эътимод супурдан лозим аст. 9. Ба ҳиссиёт ва эҳсосоти кӯдак аз ҳад зиёд диққат дода намешавад. 10. Либоси кӯдак то кӯҳна шуданаш пӯшонда мешавад, хӯрок ба андозаи лозим дода мешавад ва бе боқӣ хӯронда мешавад — аз 3-солагӣ. 11. Кӯдак аз ҳад зиёд эрка карда намешавад, корҳои хубаш кам-кам, ба андоза ситоиш карда мешаванд. 12. Вақти 24/7-и кӯдак қатъиян назорат шуда, падар ҳатман бояд донад, ки ӯ дар куҷо чӣ кор карда мегардад — ШАРТ. 13. Кӯдак ҳеҷ гоҳ бо кори бефоида ва зарарнок вонагузошта шавад. 14. Кӯдакро дашном надиҳед, таҳқир накунед, барои хатояш ба замин назанед ва сустӣ ҳам накунед. 15. Бо варзиш мунтазам машғул шавад.

Ҳамин тавр, вақте ки кӯдак ба воя мерасад, умед ҳаст, ки ӯ шакли хубе мегирад ва аз корҳои падараш миннатдор мешавад ва ба падар бо муҳаббат мемонад. Нагӯед, ки ба кӯдаки якваҷаба дӯстии худро изҳор мекунам, корҳоеро кунед, ки падар бояд кунад, вассалом.