БОБИ ЧОРУМ

БОБИ ЧОРУМ

Фасли аввал

ДУХТАР

Касе, ки писар дорад, ҷой дорад, касе, ки духтар дорад, қадр. Касе, ки духтар дорад, ноз дорад. Духтар – калиди биҳишт аст. Духтар – файзи оила аст. Духтар – чашмаи меҳр аст. Одамон чун духтар бинанд, меҳри фарзандро меёбанд. Духтар – тимсоли садоқат, рамзи покӣ, хабаррасони некӣ ва баракат аст. Касе, ки духтар дорад, ҷигараш бутун аст. Касе, ки духтар надорад, ҷигараш нуқсон дорад. Духтар – худи дили оила аст. Ҳар як духтар барои оила рамзи ҳаёт ва мамот аст. Духтарон – сир ва шарафи оилаанд. Духтар чӣ гуна бошад, оила ҳам ҳамон гуна аст. Иффат ва покии духтар – иффат ва покии оила аст. Оқила, зудфаҳм ва бофаросат будани духтар – аз саломатӣ ва сиҳҳати оила аст. Меҳнатдӯст, боадаб ва чолок будани духтар – аз комилии оила ва олии насл аст. Хушбахт ва розӣ будани духтар, дурахшон будани чашмонаш ва нуронӣ будани рӯяш – аз донишмандӣ, кушодадилӣ ва қатъияти падару модар аст. Матонат, ирода ва садоқати духтар – ҳақиқат ва сифати насл ва зоти сулола аст. Агар духтар иффатнок бошад, рӯи оила равшан аст. Агар духтар меҳнатдӯст бошад, ризқи оила пурбаракат аст. Агар духтар мулоим ва нафис бошад, дар оила сакинат ва саодат ҳукмрон аст. Агар духтар дар ҳимоя бошад, тамоми оила ҳимояшуда ҳисоб меёбад. Агар духтар аз таҳдид, ҳуҷум ва шаҳвати чашмони бегона дар амон бошад, зот, насаб ва шарафи оила дар амон аст. Агар духтар сирнигаҳдор бошад, ин барои ӯ зиреҳи абадист; агар духтар забони ширин дошта бошад, ин сипари абадии ӯст. Агар духтар қаноатманд ва итоаткор бошад, ин кафолати бахти ӯст. Ҳеҷ гоҳ чунин духтарони бофазилат ва комила бадбахт намешаванд. Духтаре, ки ба сӯи тӯри оила мекӯшад – беҳад хушбахт аст. Агар духтар беҳаё; чашмгурусна; сабуксар; беақл; шалақ, беиффат; бесабр; сабуксар; дурӯя; танбал; густох; бешарм; рӯйпӯст; беитоат; бематонат; бефикр; бефаросат; аблаҳ бошад, ба таҳкурсии он оила тарқиш афтодааст; сулола зери хатар, насл зери таҳдид мондааст. Чунин духтар мусибати падару модар; шӯрбахтии бародарон; бадбахтии шавҳари ояндааш аст. Духтаре, ки ба кӯча давида, аз хона мегурезад, насиҳат намегирад ва беназорат мондааст, шӯрбахттарин духтар аст. Бигзор ба ҳамаи духтарон шодии комил ва бенуқсон, бахт ва муҳаббати пок ёр бошад!

Акром МАЛИК