РИСОЛАЙИ МАРҒУБА

Онамнинг боболари мулла Олим раҳматуллоҳи алайҳ нақшбандия сулуки муршидларидан эди. Собиқ Шўро мустамлакаси даврида халқни динга, ахлоққа иршод қилди. Ҳақ йўлда эканлиги учун 20 йиллаб қамоқ ва сургун каби шўролар зулмини кўрди. Она томондан катта бобомиз бўлган бу зот бирламчи манбалар асосида шогирдларига, фарзандларига илм берган. Хусусан, мулла АбдулҚодир Тошкандий исмли олим зотнинг "Рисолайи марғуба" номли китоби таълим дастури бўиб хизмат қилган. Онамнинг оналари, яъни бувимиз бундан бир йил аввал шу китобни берган эдилар. Китоб Ғуломия босмахонасида 1913-йил чоп этилган 4-нашр экан. Охирги саҳифаларда китоб нозирлари ақл кўзи билан саҳвларни ислоҳ қилишлари илтимос этилган. Бувимиз берган нусха шу қадар кўп ўқилганидан титилиб кетган эди. Маълум бўлдики, уни бувимизга марҳума опалари қолдирган бўлиб, у кишига катта бобомиз ҳадя қилганлар. Камина китобни катта қизиқиш билан қўлга олдим.