РИСОЛАИ МАРҒУБА

Бобои модарам, мулло Олим раҳматуллоҳи алайҳ, аз муршидони тариқати нақшбандия буданд. Дар давраи мустамликаи собиқ Шӯравӣ мардумро ба дин, ба ахлоқ иршод карданд. Барои он ки дар роҳи Ҳақ буданд, 20 сол зулми шӯравиҳоро, монанди зиндон ва бадарға, диданд. Ин зот, ки аз тарафи модар бобокалони мост, дар асоси манбаъҳои аввалия ба шогирдон ва фарзандонашон илм додаанд. Хусусан, китоби олим зот мулло Абдулқодири Тошкандӣ бо номи «Рисолаи марғуба» ҳамчун барномаи таълимӣ хизмат кардааст. Модари модарам, яъне бибиамон, як сол пеш ҳамин китобро ба ман дода буданд. Маълум шуд, ки китоб нашри 4-уми он аст, ки соли 1913 дар матбааи Ғуломия чоп шудааст. Дар саҳифаҳои охир аз нозирони китоб илтимос шудааст, ки бо чашми ақл хатоҳоро ислоҳ кунанд. Нусхае, ки бибиамон доданд, аз бисёр хонда шуданаш фарсуда гашта буд. Маълум шуд, ки онро ба бибиамон хоҳари марҳумаашон гузошта будаанд ва ба он кас бобокалонамон ҳадя карда будаанд. Камина китобро бо шавқи зиёд ба даст гирифтам.