ТУПРОҚ БЎЛИШ, ПИСАНД ЭТИЛМАСЛИК ВА ХОРЛАНИШ ҲУЗУРИ иззат ва кўкларга кўтарилишдан кўра яхшироқ эканлигини…

ТУПРОҚ БЎЛИШ, ПИСАНД ЭТИЛМАСЛИК ВА ХОРЛАНИШ ҲУЗУРИ иззат ва кўкларга кўтарилишдан кўра яхшироқ эканлигини билармидинг?!

Одамлар сени мақтагани сайин ичинг кирга ва қурумга тўлиб кетаверади.

Кўзларинг кўр бўлиб, амалларингни баҳолашда пайпасланиб қоласан.

Мақтаётган ва улуғлаётганларнинг гаплари дилларидан чиқяптими. тиллариданми. била олмайсан.

Лекин сени сўкканларида, маломат қилганларида ҳақиқатга рўбарў келаётганингни тушун.

Ўзинг ҳақингдаги энг тўғри сўзларни тинглаяпсан. Қулоқларингга ҳақ сўзни етказган Роббингга шукурлар қил.

Оғринма. Ранжима. Ростгўйнинг тилларидан ўп.

Сени тарк этсалар, икки кара қувонишинг лозим. Чунки инсонлар ўз ихтиёрларидаги ишни қиляптилар. Улар ўз эркларини намоён этдилар. Демак, одамларнинг эркин ва ҳур бўлишларига изн берибсан, ҳеч кимни қул қилиб ушлаб турмаяпсан, ҳеч кимни зиндонга солмаяпсан. Имкон бер, имкони бор ҳамма кетсин, маза қилсин!

Сен маза қил.

Чин дилдан ҳузурлан.

Оламда қабрда яшагандек яшай олмайсанми?

Ўлганингда тобутингни минглаб одамлар кўтаришлари мумкин.

Лекин қабрга қўйганларидан сўнг кетадилар. Ўрнингдан туриб бирор кишини ушлаб қола оласанми? Қолинглар, кетмангизлар дея оласанми?

Охирги манзил ва шаксиз ҳақиқатнинг исми Қабр-ку.

Ҳозирданоқ қабрда яшагандек яшаган одам Қабрга тушгач яшашга қийналмаса керак, иншаАллоҳ. Валлоҳу аълам.

Жанозангга келганларни ҳайдай олмаганингдек, ҳузурингга келганларни ҳайдама.

Қабрда сени қолдириб кетганларни олиб қола билмаганингдек, кетганларни олиб қоламан дема.

Ўзгаларни ҳам, ўзингни ҳам эркин яшамоғинг учун шароит ярат. Қабрда одамлардан қанчалик эркин бўлсанг, ҳозир ҳам эркин бўл. Бошқаларнинг ҳам шундай бўлишларига тўсқинлик қилма, ҳошо!