Бул текстте эскилердин, андан да тагыраак айтсак, агартуучулук үй-бүлөлөрдүн тарбия ыкмалары жөнүндө айтып…

Бул текстте эскилердин, андан да тагыраак айтсак, агартуучулук үй-бүлөлөрдүн тарбия ыкмалары жөнүндө айтып бергим келет. Эгер перзенттериңиздин таза ойлуу, зээндүү, бири-бирине мээримдүү жана ынтымактуу болушун кааласаңыз, бул эрежелерди бекем өздөштүрүп алыңыз жана иш жүзүндө колдонуңуз: 1. Эч качан балдарыңызды жерге урбаңыз. Сенин колуңдан келбейт, сен шалпаңсың, акмаксың дебеңиз. Мүмкүн болушунча жакшы сөздөр менен тарбиялаңыз. Демек, балага кордогон сөздөрдү айтуу таптакыр жана таптакыр тыюу салынат. 2. Эч качан балаңыздын кемчиликтери жөнүндө эң жакын адамдарыңызга да арызданбаңыз. 3. Балаңызды бөтөндөрдүн алдында да, туугандардын алдында да урмат менен чакырыңыз, ага жумшактык менен мамиле кылыңыз жана ошол эле учурда эркелетип, эрке-тантык кылып жибербеңиз, ката кылса да, муну олуттуулук жана жумшактык менен айтыңыз. 4. Балага жаза берүү зарылчылыгы туулса, адегенде айыбын мойнуна алдырыңыз. Ал өзү түшүнүшү үчүн шарт түзүңүз. Андан соң ал жазага татыктуу экенин түшүнөт. Жазада чектен ашпаңыз. Бирок жазадан мурда үч жолу так жана ачык кечириңиз. 5. Урматтуу энелер! Күйөөңүзгө ачууланып, балаңызга катуу сүйлөбөңүз, бул тарбиясыздыктын жана акылсыздыктын белгиси. 6. Бала ката кылса, кандай катага жол бергенин өзү түшүнүшү үчүн аракет кылыңыз. «Өзүң ойлонуп көр» деп айтууну билиңиз. Капа болсоңуз, муну айрым белгилер менен билдириңиз. Ал атамды же энемди капа кылдым деп ойлошуна, кайсы иши буга себеп болгонун ойлонушуна, өкүнүшүнө жана аны өз демилгеси менен оңдошуна жол бериңиз. 7. Уул бала чечкиндүү болушу үчүн ага чечкиндүүлүктү талап кылган иштерди буюруңуз. Кыз бала назик болушу үчүн дайыма жумшак мамиле кылыңыз. Кыз балага да, уул балага да атанын өзү ачык айтпай, эне аркылуу айтканы оң. Бул иерархиялык тартип өтө маанилүү. 8. Перзенттериңизди үй-бүлөнүн сырларын, өзүнүн сырларын бекем сактоого көндүрүңүз. Ал үчүн сыр болгон жана сиз биле турган нерселерди өзүнөн башкага, же башканын алдында бетине салбаңыз, айтпаңыз. Айрым учурларда ортоңуздарда сырларыңыз бар экенин ишарат менен билдирип коюңуз: «Өзүң билесиң да!» — деген түрдө. 9. Урматтуу ата-эне! Ортоңуздарда келишпестик чыкса, эч качан бири-бириңизди балаңызга жамандабаңыз. Бул тарбия эрежелерин катуу сактасаңыз, жай мүнөздүү, кыжырданбаган, сабырдуу, жумшак жана салабаттуу, зээндүү жана табияты таза перзентти чоңойтосуз, иншаАллах. Албетте, балаңыздын акысына дайыма дуба кылыңыз. Бир да күнүңүздө бул дубаны унутпаңыз. Бала тарбиясына байланыштуу көп эрежелер бар, негизги деп эсептелгендери баяндалды.

Акром МАЛИК