Ахли дүйнө — дүйнө ээлеринин карама-каршысы ахли Хак. Башкача айтканда, Хактын ээлери. Алар дүйнө менен иши…

Ахли дүйнө — дүйнө ээлеринин карама-каршысы ахли Хак. Башкача айтканда, Хактын ээлери. Алар дүйнө менен иши болбогон, Хак тарапта гана болгон, ою, пикири, зикири Хактын сөздөрү менен бекем байланган адамдар. Ахли Хак — бул дүйнөнү таштап кетүүчүлөр эмес. Дүйнөнү бир унаа, араба же кеме катары элестеткендер. Бул нерселердин ар бири адамдын максатка жетиши үчүн кызмат кылгандай эле, дүйнө ахли Хактын максатка жеткирүүчү каражаты. Хак ээлеринен болуу кедей болуу дегени эмес. Хак ээлери бай-бакуубат, абройлуу, кадыр-барктуу да болушат. Алар такт ээси катары мамлекет башкарышы да мүмкүн. Башкача айтканда, алардын иштери, кесип-кесиптери сырткы жагынан карапайым адамдардан айырмаланбайт. Бирок ичинде дүйнө үчүн кылдай да орун беришпейт. Алла дүйнөнү берсе, сүйүнүшпөйт; алса, күйүнүшпөйт. Алардын да айрым сапаттарын карап чыгалы: — адамдар көңүл бурса, көңүл бурбагыла дешпейт; — адамдар жүз бурса, мага көңүл бургула дешпейт; — мусибат келсе, кайгыга түшүп наалышпайт; — ийгиликке жетишсе, эсин жоготкудай болуп кубанып, секиришпейт; — адамдарды ашыкча жек көрүү менен жемелешпейт же ашыкча ашырып-тасырып мактап, көккө көтөрүшпөйт; — алардын айбаты жакшылардын жүрөгүн кубанычка, жамандардын жүрөгүн коркунучка толтурат; — ар кимдин сөзүнө ишене беришпейт, чындыктар илахий белгилер жана ишараттар менен көрүнөрүн сабыр менен күтүшөт; — окуянын сыртына эмес, маңызына көз салышат; сүйлөөнү эмес, угууну жакшы көрүшөт — унчукпоосу маегинен үстөм болот; — алар макулуктардан коркушпайт, эч кимге зулумдук жана адилетсиздик кылышпайт; — адамдарга кулчулук кылышпайт, башкаларды да өздөрүнө кул деп билишпейт — ар кимдин эрки өз ыктыярында деп билип, бардык иштерди Жаратканын өкүмүнө тапшырышат; — алардын абалы — салмактуулугу, кадыры эч бир абалда өзгөрбөйт; — алар адилетсиздик, зулум, ыйбаасыздык, Кудайдын буйруктарына тескери баруу менен эч качан жана эч качан элдешишпейт, эч качан жана эч качан ыраазы болушпайт; — алар эч качан дүйнө жана ырыскы түйшүгүнө түшүшпөйт; алар алсыздарга боорукер, залимдерге айбаттуу, күйөрмандарына марттар; — өздөрүнө жеткен азаптар үчүн өч алышпайт жана бул жагынан баарын оңой кечиришет; — алардын ачуусу сабырынан, ырайымынан жана боорукердигинен үстөм келбейт. Адам Хак ээлеринин бул сапаттарын билип, кайра-кайра окуп жаттап алганы жакшы. Мунун эки пайдасы бар: биринчиси, мына ушундай мүнөздүү адамдарды көрсө, дароо дубасын алат, кызматын кылат, назарына илинет, натыйжада абдан көп жакшылыктарга жетет; экинчиден, өзүндө да ушул сапаттарды жана мүнөздөрдү калыптандыруу үчүн аракет кылат; мен киммин деген учурда мына ушул таразаны, мына ушул талаптарды өзүнө коёт жана мына ушундай адам болушум керек деп умтулат.

Акром МАЛИК