Жүрөгүңө назар сал: ал дос каалап жатабы? Бирөө болсо, аны менен кайгы-капамды бөлүшсөм деп жатабы? Ал мага,…

Жүрөгүңө назар сал: ал дос каалап жатабы? Бирөө болсо, аны менен кайгы-капамды бөлүшсөм деп жатабы? Ал мага, мен ага миннетсиз таяныч болсом деп жатабы? Сырларымды жашыра турган, мага жакшылык каалаган, мен үчүн дуба кылып, адашсам, туура жолго баштай турган дос мага керек деп жатасыңбы? Анда бул сөздөр сен үчүн: суранам, шашпа! Биринчиден, андай дос бир гана адам болорун билип ал. Экинчиден, ал дос кыяматтык болорун унутпа. Кыяматтык дегени — сага тозок өкүмүн чыгарышса, сенин күнөөлөрүңдү да мойнуна алып, бейишке киришиң үчүн Кудайга жалбара турган дос. Ушул дүйнөдө эле айрым кемчиликтериңди билип алып, аны баарына сатып, буттун астына тепсеген чыккынчынын чыккынчы аялдан эч айырмасы жок. Үчүнчүдөн, айланаңа назар сал: ким ушундай болууга арзыйт? Кимдин жүрөгүндө доско муктаждык бар? Дос боло ала турган деңгээлде бийик даражалуу, мард жана терең ойлуу адамды көрүп жатасыңбы? Жана ал адам сага мээримдүүбү? Төртүнчүдөн, ушундай адамды тапсаң, беш жыл күтүшүң керек. Биринчи жылы аны үйрөнөсүң. Анын алсыз жана күчтүү жактарына карайсың: калпычы, куру убадачы, эки жүздүү жана көп сүйлөгөн, иштерин чала-чарпыт кылган болсо, үнсүз жүз буруп кет. Мындай начарлар менен маектеш да болбо. Эгер байкоолоруңдан анын таза жана адал экенин аныктасаң, эми ага материалдык жакшылыктарды кыл, акырындап маек кур, анын дүйнөсү менен тааныш. Чогуу шериктеш иштерди кыл. Бирок өзүң сыр бербе. Бул абал бир жыл уланат. Үчүнчү жылы андан бир аз алыста, анан андан жардам сура; акча ал да, кайтаруу мөөнөтүн кечиктирип, кыйналган абалда кайтар. Төртүнчү жылы ага олуттуу сыноо бер: катуу сүйлө, капа кыл; таарынт. Эгер ал бул абалдарга карабай сага ырайым менен караса, сени таштап кетпей, сени түшүнүүгө жана жол көрсөтүүгө аракет кылса, демек, сыноодон өттү. Бешинчи жылы аны эми дагы катуу текшер; бардык абалдарды талдап чык. Жалпысынан, беш жылда турмуш да адамды ар тараптан көрүшүңө мүмкүнчүлүк берет. Жүрөгү жумшак, акылы саламат, ою терең, иши адал, зээни курч, боорукер, өз ордунда катаал, дос үчүн жанын берүүгө даяр; ар дайым коргоого шай жана анын да жүрөгү доско, сырдашка муктаж болсо, ант беришип, сырды ачышып, достошсо болот. Антпесе, жалган достун тузагына түшөсүң да, кыйрайсың. Чыныгы дос тапсаң, чыккынчылык көрбөйсүң. Чыккынчыга жолуксаң, ал эки дүйнөдө тең бооруңду күйгүзөт. Сени сатып, сага жамандык кылат; көрө албастык менен сенин абийириңе жалаа уюштурат. Берилгендерге салам, чыккынчыларга Алланын жазасы болсун!