МУХТАСАР ДАР БОРАИ ТАРҶУМАИ ҲОЛИ КИТОБИ «ҲАЛҚА»

Бо иноёти Аллоҳ, дуои бузургон ва ёрии одамони нек китоби «Ҳалқа» аз чоп баромад, алҳамдулиллоҳ. Ин китоби ғариб тарҷумаи ҳоли вазнине дорад. Ин китоби бечора дар зиндон таваллуд шуд. Дар озодӣ ба воя расид. Овозаш ба ҳама ҷо паҳн шуд, аммо худаш роҳ гашта натавонист. Ниҳоят, моҳи майи соли 2021 «Академнашр» бори аввал онро нашр кард. Лекин моҷароҳое, ки дар ин бора рух доданд, бениҳоят дардоваранд. Баъд боз як нашр шуд, ин дафъа бо хотираҳо ва хатоҳои аз он ҳам азобовартар дар ёд монд. Баъд боз чоп карданд – ба муқова сурате гузоштанд, ки ба мо маъқул набуд. Ҳарчанд гуфта будем, ки маҳз инро нагузоред, маҳз ҳаминро интихоб карданд. Баъд боз ду бори дигар бароварда шуд: корҳои чопӣ мувофиқи дил нагузаштанд. Баъд бо умеди сифати хуб онро аз Туркия баровардем. Аммо чӣ бадбахтӣ, ки китоб якбора ба асорат афтод: даҳ ҳазор нусха ҳанӯз дар анбори гумрук дар зери чанг хобидааст. Баъд дар бораи он овозаҳои гуногун паҳн шуданд: «Ҳалқа» манъ шудааст!» «Дар як маркази таълимӣ барои он ки китоби «Ҳалқа» доштааст, соҳибашро ҷарима кардаанд!» Ҳатто кадом як канали телеграм «китоби «Ҳалқа» манъ шуд, ҳама китоби дасташонро ба шӯъбаи корҳои дохилӣ оварда супоранд!» – гуфта амр кард. Аз паи ин амр рафта пурсуҷӯ кардем, гапи беасос баромад. Ба хаёл тахмин омад, ки шояд ин ташаббуси шахсии ягон ҷонфидои аз давраи шӯравӣ мондагӣ бошад. Лекин мо умед накандем. Вазъиятро ба Сарвари давлатамон баён карда нома навиштем. Расман ба портали ҳукумат ҳам муроҷиат кардем. Мушкиле, ки дар тӯли як соли пурра ҳал нашуда буд, камтар аз як ҳафта ҳал шуд: ниҳоят, барои чопи китоби «Ҳалқа» расман тавсия дода шуд. Мо аз ин шод шудем, ба Аллоҳ ҳамд гуфтем. Акнун аз аксари китобхонҳои авомуннос саволҳое чун «Оё «Ҳалқа» таҳрир шуд? Тағйир дода шуд?» қатъ намешаванд. Мехостем, ки ҳар як китобхон ба ин саволҳо шахсан худаш ҷавоб ёбад. Қани, бинед-чӣ, асар кӯтоҳ карда шудааст? Агар чунин бошад, кадом ҷояш хориҷ карда шудааст? Хориҷ шудани он ба ғояи асосии асар чӣ гуна зиён расондааст? Марҳамат, ба чунин саволҳо низ ҷавоб ҷӯед. Мо бошем, ба сифати муаллиф, аз нашри қиссаи «Ҳалқа», ки моҳи оянда панҷсола мешавад, беҳад шодем. Аз он ки панҷ сол боз хонда мешавад, ба Аллоҳ ҳамд мегӯем. Баъзеҳо зикр мекунанд, ки нусхаҳои аввалинаш ба чорсад ҳазор сӯм фурӯхта мешаванд. Дар бораи он ки чанд нусхаи бе иҷозат чопшуда, паҳншуда ва фурӯхташуда ҳаст, мо тамоман маълумот надорем. Илтимоси мо аз китобхонҳои мӯҳтарам ин аст, ки гапу сухани ҷо ва беҷо дар бораи китоб, нашру сифати он, таҳриру тасҳеҳи он барои муаллиф ҳеҷ осон қабул намешавад, ҳар кадоме, агарчи андаке бошад ҳам, нишони дард мегузорад. Азизонам, аз муҳокимаҳои гуногуни беасос ва нолозим худдорӣ карда, беҳтараш дуо кунед! Масалан, ин гуна: «Аллоҳо, китоби «Ҳалқа»-ро барои мо манфиатбахш гардондӣ, манфиати онро барои наслҳоямон низ пойдор гардон! Насиб кун, ки китоби «Ҳалқа» ҳалқаи мустаҳкаме бошад, ки дилҳо онро маҳкам медоранд! Аллоҳо, бигзор китоби «Ҳалқа» бемалол, озоду бемамониат аз чоп барояд! Гуноҳҳои муаллифро афв кун! Ӯро дар паноҳат нигоҳ дор! Ба ӯ барои навиштани асарҳои боз ҳам беҳтар илҳом ва қувват бидеҳ! Аз чашму сухани бад нигоҳ дор! Ба онҳое, ки ба шахсияти ӯ душманӣ кардан мехоҳанд, инсофу хайрхоҳӣ бидеҳ! Ба мо бошад, ёрӣ ато кун, ки ба ӯ дӯст шуда, бо дуоҳо мадад ва дастгир бошем!» Оё дар олам аз чунин дуоҳо некии бузургтаре ҳаст, ки аз Шумо ояд? Ҳам барои «Ҳалқа», ҳам барои навиштаҳои нави оянда ба чунин дастгириҳои шумо хеле муҳтоҷем!

Бо камоли эҳтиром, хизматгори фақири шумо Акром Малик 8-уми зулҳиҷҷаи соли 1446-и ҳиҷрӣ; 4-уми июни соли 2025-и милодӣ; рӯзи чоршанбеи муродбахш навишт.