БОБИ СЕЮМ

БОБИ СЕЮМ ПИСАР

Фасли панҷум Бародарон

Бародарон ҷанг намекунанд. Онҳо ҳасадхӯр нестанд. Онҳо ба якдигар меҳрубон, ҳамкор ва соҳибҳимматанд. Бародари калон некиеро, ки ба бародари хурд кардааст, ҳисоб намекунад. Бародари хурд ёриашро барои бародари калон миннат намегузорад. Бародарон ҳаргиз якдигарро дар канор намегузоранд: онҳо ҷамъ шуда, ба падару модар тӯҳфаҳо омода мекунанд; ҷамъ шуда, ба якдигар мошин, хона мехаранд; дар некӣ кардан ба якдигар мусобиқа мекунанд. Агар ҳама ба ин қоида баробар амал кунанд, ҳама розӣ ва хушнуданд. Агар як ҷониб амал карда, ҷониби дигар бемасъулиятӣ кунад, кор вайрон мешавад. Бародарон ҳамеша якдил буда, хатоҳои якдигарро мебахшанд, феъли якдигарро бардошт мекунанд; вақте бародари калон ба ароба савор мешавад, бародари хурд дар замин намемонад; вақте бародари хурд бо мошин мепарад, бародари калон пиёда намемонад. Бародари хурд ҳатто аз бародари калон шарм дошта, мошин савор шуда наметавонад: меандешад, ки чӣ гуна аз бародарам пештар. Мегӯяд: аввал бародарам, баъд ман. Бародари калон низ беҳтарин чизҳояшро ба бародари хурд раво мебинад. Байни бародаронро занон метавонанд хусумат андозанд, бинобар ин бародарон назди занони худ ҷигарҳояшонро ғайбат намекунанд, бародарам гуфта, аз даҳонашон асал мечакад. Ба фарзандонашон талқин мекунанд, ки амакат ба ҷои ман падар аст. Бародарон барои ёрӣ ба якдигар аз ҳар гӯшаи рӯи замин расида омада метавонанд. Бародарон аз иттифоқи байни худ хушбахтӣ эҳсос мекунанд. Бародарон аввалин некиро ба якдигар раво мебинанд. Бародарон барои он ки падару модарро нороҳат накунанд, нуқсонҳои якдигарро пӯшида, ба падару модар танҳо некӣ ва зебоӣ нишон медиҳанд. Агар аз миёни бародарон касе гумроҳ шавад, бо меҳру шафқат, тарбия ва танбеҳ ӯро ба роҳи рост баргардонда метавонанд. Бародарон барои он ки фарзандонашон аҳлу иноқ бошанд, шароит фароҳам оварда, зуд-зуд ба хонаи якдигар меҳмон мешаванд. Ҳашарҳо ташкил медиҳанд. Аз байни бародарон мӯй намегузарад. Иттифоқи бародарон оламҳоро фатҳ мекунад, адоваташон ҷаҳонҳоро оташ мезанад. Бародарон ҳаргиз аз якдигар даст намекашанд, дар олам кадом хешованди хунӣ аз бародар наздиктар аст?! Бародари хурд ба танбеҳ ва дастурҳои бародари калон итоат мекунад, амри бародари калон барои бародари хурд ба ҷои амри падар аст. Бародари хурд аз он ки сухани бародари калонро ба замин гузорад, ҳаё мекунад. Бародари калон ҳамеша сарвари бародари хурд аст ва ҳеҷ гоҳ ӯро ба ҳоли худ намегузорад. Бародари калон ба оилаи бародари хурд, бародари хурд ба оилаи бародари калон ҳам мураббӣ ва ҳам аз дигар ҷиҳатҳои зарурӣ ғамхор ва масъул аст.

Акром МАЛИК