Кетсанг, розилик олиб кет. Кимдан қарздор бўлсанг, албатта, уни рози қил. Қарздорлик деганда маънавий қарзни…

Кетсанг, розилик олиб кет. Кимдан қарздор бўлсанг, албатта, уни рози қил. Қарздорлик деганда маънавий қарзни кўпроқ назарда тутилмоқда.

Сенга илм берган, ҳунар ўргатган, оғир кунингда бағрига босган, яхшилик қилган, қай шаклда ва қанча миқдорда бўлмасин, сенга мадад қўлини узатган инсон сендан афзалдир.

Қонуният шу.

Сен ундан қарздорсан.

Шундай қарзлар борки, коинотни сотиб, пулини берсанг ҳам, узилмайди. Балки унинг ҳаққи кўнгилнинг ичида. Қалбда.

"Мендан рози бўлинг, берган нон-тузингизга рози бўлинг. Илмингизга, меҳр-у муҳаббатингиз учун рози бўлинг. Биз лойиқ бўла олмадик, қошингиздаги қарзимни ҳеч қачон уза олмайман", – деб қўй. Шундай дейишни бил. Бу гаплар ҳақиқат эканлигини чин дилдан англа ва сўнг тилингга чиқар.

Бўтам, кўнгил – Тангрининг назаргоҳи. Ҳаққи сенга ўтган одамни рози қилмай туриб, косанг оқармайди. Сенга ҳаққи ўтган одамнинг қалбида озгина бўлса ҳам ранж бор экан, ўша ранж сени ҳеч қачон қўйиб юбормайди.

Бўтам, кимгадир эгилиб, қўлини ўпдингми, кимдандир қарздорлик ҳис қилдингми, оқ фотиҳасини ол, дуосини ол ва ҳамиша йўқлаб тур.

Бу сен учун жуда катта иқбол ва истиқбол эшикларини очади, иншааАллоҳ. Шубҳасиз.