Йиқилганингда тур дейдиган одаминг борми?

Йиқилганингда тур дейдиган одаминг борми? Қайғу сени эгаллаб олганида ҳаммаси яхши бўлади дейдиган-чи? Сени зулматлардан чиқариш учун чин дилдан курашадиган кимдир мавжудми ҳаётинг саҳросида? Байрамларда ош ейдиган; бирга қаҳва ичадиган; иши тушса йўқлайдиган; қарз сўрайдиган, ёрдамларингдан иштаҳа ила истифода қиладиганлар эмас, сен учун ғам чекадиган, ҳамдард бўладиган ҳеч кас борми?.. Катта эҳтимол билан ЙЎҚ деган жавоб айтасан. Чуқурроқ ўйласанг, шафқатсиз жавоб шу. Бор деб ўйлаяпсанми? Борларнинг из қолдирмай кетишларига ҳаётнинг ўзи гувоҳ қилади сени. Шул боис, атрофингни тўлдирган шишадошларингга ишонма, яъни уларга суянаман деб ўйлама. Сенга суянишларига изн беришинг мумкин, лекин уларга суянма. Суянма, йиқилиб тушасан. Тутиб қоладиган одаминг йўқ бу оламда. Агар бўлса… демак сен ҳам, у ҳам инсоният ичида ўта ноёб, ҳаддан ташқари ноёб тоифадансизлар. Сизларнинг қийматингиз йўқ. Қолганларнинг ҳаммаси эриган маъданнинг кўпиклари бўлса, сиз маъданнинг ўзисиз. Лекин бундай бўлиши учун садоқат, йиллар ва синовлар керак.