Эң туурасын табуу – машакат. Ишене бер, ушундай.

Эң туурасын табуу – машакат. Ишене бер, ушундай.

Жүрөгү ойгоо жана идиреги терең адам эч качан жалганга көнбөйт. Ал дайыма чындыкты каалайт. Адашып, тентип жүрсө да, чындыкка кайтат.

Жашоодо белгилүү мыйзамдар бар. Аларды ачуу жана ошонун негизинде өмүр өткөрүү – мына ушул максат. Бул ачылыштар сени коргойт: дүйнөдө шерменделик менен кордуктан, акыретте тозоктон.

Сен ал мыйзамдарды эки өмүр жашасаң да таап, түшүнүп, аягына чыга албайсың, бирок устаздын жетекчилиги менен баарына жетесиң.

Устаз – өзүнөн мурдагылардын илим деп аталган аманатын ичине салып алган зат. Устаздын ушул турушу кырк каракчынын үңкүрүндөй. «Сим-сим! Эшигиңди ач!» – десең, бул үңкүр ачылат.

«Сим-сим!» деген сыйкырдан максат – устаздын ачкычын тап, анын тилинен бермет-жоохарлар жаашын кааласаң, сөзгө тарт, кубант.

Маани байлыктары ар кимге талабына жараша берилет. Азына көнсөң – азыраак. Көбүнө көнбөсөң – андан да көбүрөөк.

Текебердик менен ачуу, гапылдык менен жаман ой маани берметтерин алууга сага тоскоол болот. Сен көргөн нерсе сен көргөндөй эмес экенин, укканың укканыңдай эмес экенин да түшүнүү үчүн акыл көзүң көрүшү керек.

Жаштар, жакшы устаз тапсаңыздар, коё бербеңиздер. Дарыяда агып бара жатканда, сиздерге ыргытылган арканды коё бересиздерби эч?!