Пайдалуу иштер адамды чарчатпайт. Адамды пайдасыз жана зыяндуу иштер алсыратат. Адам баласы өз жашоосуна көз…

Пайдалуу иштер адамды чарчатпайт. Адамды пайдасыз жана зыяндуу иштер алсыратат. Адам баласы өз жашоосуна көз салып, өзүн көңүлдөгүдөй жашабай жаткан абалда тапса, өмүрүн ысырап кылып жатканын түшүнүшү керек. Өмүрдүн ысырабы – пайдасыз нерселер менен алек болуу. Мейли оюн-күлкү кылсын, мейли башка иш – адамда бир аз инсап болсо, анын не дүйнө, не акырет үчүн пайдалуу иш кылбаганын сезсе, кысылат, кайгыга батат. Кайгыга батпаса, демек, ал тирүү туруп эле өлүк. Пайдалуу иш кылган киши үчүн иштин пайдасын ачуу жана ага ишенүү маанилүү. Бүгүн кылып жаткан иши эртең мөмө бербесе, капа болуунун кереги жок, көбүнчө улуу жана бышык натыйжалар узак жылдар бою тынбай иштөөнүн натыйжасында пайда болот. «Азыр алекмин, эң керектүү иш менен алектенип жатам» деп бекем ишенген адам токтобосо, жылдар өтүп, албетте, натыйжаны көрөт. Ал адал натыйжа толугу менен аныкы. Ал ага таза абийир жана кубаныч менен ээлик кылат. Ал эми эмгек кылбаган, сабыр жана туруктуулук көрсөтпөгөн киши утулат. Жылдардан кийин ал куру кол калат. Убактысын пайдалуу иш менен өткөргөн адам жайбаракат, ооба, ал иши үчүн азырынча мөмөсүнүн даамын таткан жок, бирок жайбаракат, анткени ал бул убакытты бекер эле сапырып жиберген жок; күнөө жана тоготпостук менен жашаган жок – тынчтануу жана сооронуч үчүн ушул жетиштүү. Тескерисинче, бекер жашаган адам башкаларды канчалык «улуу» иштер менен алек экенине ишендирип алдабасын, бүт адамзат аны «ооба, ал чын эле алек» деп ойлобосун, бул калп эки жол менен далилденет: биринчиси, адам жүрөгү менен калп айтып жатканын сезип турат; экинчиси, эртең анын колунда эч кандай натыйжа болбойт. Натыйжа болуш үчүн бүгүн иштөө керек. Бүгүн аракет керек. Бүгүн күрөшүү керек. Токтобоо зарыл. Бул кийинки иштер үчүн күч берет; ал эми калпычылык адамдын кубатын соруп алат. Ошентип, пайдалуу иш кылган чарчабайт, иш аны кийинки ишке шыктандырат; ал эми бекерчи алсырайт, анын кийинки кадам үчүн кубаты болбойт, абийир азабы жана өкүнүч аны жеп бүтөт. Азыр эле пайдалуу ишке киришүү керек.

Акром МАЛИК