Дунёнинг оғир юки – ғамдир. У юракни чарчатади, руҳни толиқтиради, ҳатто ҳориган руҳ ўзини ташлаб юборади,…

Дунёнинг оғир юки – ғамдир. У юракни чарчатади, руҳни толиқтиради, ҳатто ҳориган руҳ ўзини ташлаб юборади, тик тургиси келмайди, шу сабабли қайғули одамлар ҳолсиз бўлиб, ётиб қолишади. Энг яхши дўст – сен учун ғам юта оладиган дўстдир. Аслида, сенинг ғамингни кўтаришадиган одам дўст дейилади.

Инсон учун ғамнинг сабаблари кўп. Энг оғир сабаблардан бири – фарзанднинг кўзёши ва бахтсизлигидир. Ота-она бу ғам қаршисида ожиз қоладилар. Ота-онага хизмат уларга кечқурун тўшакларини тўшаб, эрталаб иссиқ сувни таҳорат учун тайёрлаш ёки мазали таомлар билан меҳмон қилишдан иборат эмас, балки ота-онага бошингга тушган қайғуларни билдирмаслигинг энг улкан яхшилигингдир. Эси йўқ ва калтафаҳм одамлар ўз муаммоларини ота-онага рўпара қилишади.

Ундан ҳам афзали – бахтли ва шодон яшамоғингдир. Муаммога олиб борадиган ишларни қилмаслигингдир. Зотан, инсон ўз хатолари сабабли ғамга учрайди. Гуноҳлари ва нафсига эрк берганлиги учун унинг елкасига изтироб тошлари қўйилади. Агар одам гуноҳлардан тийилса, нафсини жиловлаб, Ҳаққа бўйсундириб яшаса, бахтсиз бўлмайди, акс ҳолда, бахтсиз бўлади, сўнг ота-она азоб тортади. Ҳатто ота-она ўтган бўлса, руҳи чирқирайди.

Шу чоққача ота-оналаримизга етказган озорларимиз учун улардан кечирим сўрайлик. Энди бахтли яшаб, у қайғуларни унуттирайлик. Уларнинг руҳи чарчаб қолмасин.

Ота-онасини ўз ғамлари ила йиғлатганларга Аллоҳ бор.

Акром МАЛИК