Күн сайын таң эрте кандайдыр бир текст жарыяланып турчу, бирок айрым иштерге убакыт бөлүү зарылдыгынан бул…

Күн сайын таң эрте кандайдыр бир текст жарыяланып турчу, бирок айрым иштерге убакыт бөлүү зарылдыгынан бул тексттерге жумшала турган мүнөттөрдү үнөмдөөгө аракет кылынды, бирок бүгүн бир ой келип калды да, Алладан жардам сурап жазууга киришилди. Өлүм келе электе өлгүлө дешет. Бул — өлүм келе электе өлүмгө даяр тургула: жакшы амалдарды көбөйткүлө, жаман иштерди токтоткула дегени. Ирфаний мааниси — Хак Тааланын жолуна чыктыңбы, бул жолдо келе турган азаптарды өлүктөй кабыл ал, дат-вай кылба дегенди билдирет. Өлгөн адамды көмүшөт. Мүрзөгө жайгаштырып, дос-душман топурак салып кайтышат. Эң сүйгөн адамың да мүрзөгө сени менен бирге көмүлө албайт. Өлгөн адам да өзүн ушундай сезиши керек экен: перзенттери, дос-жарандары унчукпай, балким айрылуудан эч кандай азап тартпай кетип калышканын билип, өлүк көрдөн баш көтөрүп, кетпегиле дей алабы? Же кимдирдин этегинен кармай алабы? Албетте, жок. Өлүмдөн мурда өлсөң, мүрзөгө кирерден мурда кирсең, сени ким таштап кетсе да, ушундай болосуң. Болду. Бүттү. Күйүнбө. Кеткен адам сени мүрзөгө койду. Эми артка кайтпайт. Мүрзөнү эч качан ачып, сени тирилтип алам деп ойлобойт. Өлүк аны көмгөндөрдү жемелебегендей эле, кеткендерди сен да жемелебе. Тирүүлөрдү өз абалына кой. Сен өз эсебиңди күт... Кеткендерден ыраазы бол. Жашоону көрдүң го, канчалык азаптуу, эч кимге бул азаптарды ылайык көрбө. Билдиң, күнөөкөрлөр абдан көп, кеткендердин күнөөкөр болушун эмес, сооптуу болушун каала. Билдиң, дүйнө ғафилдерге толуп-ташкан, кеткендердин сергек болушун каала. Билдиң, дүйнөдө шайтандын достору чексиз көп, кеткендерге Алланын достугу насип кылсын! Сендеги күнөө себептүү алар кеткен болсо, кубан, кандай гана таза адамдар экен алар! Сенин оюңча, алар жаңылып жаткан болсо, анда күйүнүү эмне үчүн?! Жалгыз айыбы сени таштап кеткениби? Бул айыбы үчүн аларды кайсы сотко тартмакчысың? Астағфируллах! Алар ачык жүз менен кетпесе да, сен ачык жүз менен кал. Алар таттуу сөз менен таштап кетпеген болсо, сен таттуу сөз айт. Дүйнө мындай кастыктардын жери эмес жана өмүр мындай кайгыларга сарп кылуу үчүн берилген эмес. Оо, кымбаттууларым! Көңүлүңүз кең, оюңуз тынч, жакшылыктар дос, бактыңыз кем-карчсыз болсун! Сиз эң туура тандоо жасадыңыз. Эң туура иш кылдыңыз. Сиз жакшысына татыктуусуз. Аллага аманат болуңуз!

Акром МАЛИК