Ассалому алейкум!

Ассалому алейкум!

Кээде илим алууга жөндөмү жана шыгы бар, бирок шарты жок жаштарды көрүп, аларга жардам бергиң келет.

Жардам берейин дейсиң, бирок мүмкүнчүлүгүң ушунчалык гана болот.

Ошондо бул мекендин байлары акчаларын эмне кылышат болду экен деген көз артар бир ой мээде айланат.

Балким, алар баарынан жашыруун тынымсыз садака берип жатышкандыр, биз болсо кабарсызбыз.

Балким, алардын амалкөй мээлеринде башкаларга жардам берүү, элдин агартуусуна салым кошуу деген ойдун уругу да жоктур.

Балким, алар китеп окуу тургай, тамга тааныбайт.

Балким, алар абдан артта калган, ашкере рухий жакыр, ашкере коркок, ашкере текебер, наадан, акча кутурткан адамдардыр.

Балким, аларга эч бир насаат таасир этпейт.

Балким, алардын жүрөгүндө акыреттин кылдай да камы жоктур.

Балким, алар эки жүздүү, мактанчаак, буту жерден ажыраган, эч кимди тоотпогон өзүмчүл, көңүл оорутуучу жана пасткечтердир…

Оо, Кудай!

Адашып жаткандырмынбы?!

Кандай болгон күндө да, өлкөбүздө бир да бай жаштарды окутуу үчүн грант бере турган бир да уюм түзгөн жок, кандай болгон күндө да, бир да байдын деңгээлдүү сүйлөгөнүн уккан жокмун же ой жүгүртүүсү өтө төмөндөрү гана трибунага чыкса керек.

Акчалууларга жагынгандардан Кудай сактасын! Анткени наадан акчалуудан анын жагынчаак иттери жана жалынган күчүктөрү жийиркеничтүүрөөк.

Муну айтуудан максатым мындай: Кудай илим же билим алууда илимди тоотпогон адепсиз, наадан жана дүлөй акчалуудан бизди түбөлүккө үмүттүү жана көз артар кылбасын!

Илимге ашыктарга Раббимдин Өзү жардам берсин, оомийин!

Акром МАЛИК