Баалуулуктарга берилген абалда жашоо оңой эмес. Адам өзүнө бир эрежени баалуулук катары тандап алса, аны бул…

Баалуулуктарга берилген абалда жашоо оңой эмес. Адам өзүнө бир эрежени баалуулук катары тандап алса, аны бул баалуулуктан ажыратуу үчүн чабуулдар башталат. Бул өтө жөнөкөй мыйзам ченемдүүлүк. Бир нерсеге ээлик кылам десең, албетте, тартып алууну каалагандар табылат. Сен өзүң каалаган баага татыктуу экениңди, албетте, далилдешиң зарыл. Ошентип бул дүйнөдө ар ким өз чегин сызууга жана аны коргоого аргасыз. Эч качан бир жеңиш же табылга бекер берилбейт, дүйнө жашоосунда бардык нерсенин баасы бар. Колуңдагы ар бир нерсени коргоп жашашың шарт, коргобосоң, шексиз, андан ажырайсың. Башкалардын көз карашында бир кишинин жеткен марасы же жеңиши оңой келгендей сезилиши мүмкүн. Такыр андай эмес – анын артында күрөш жана азаптар бар, болгону аны биз көрбөйбүз. Эгерде оңой жетилген болсо да, көрө албастыктын кереги жок – ал тез эле колдон чыгып кетет. Анткени адамзат кыйналып, жан үрөп жетпеген нерсесине абдан кайдыгер. Баалуулуктар да дал ушундай – жаш жигит, зээндүү жана тырышчаак жигит, мисалы, ар түрдүү уламалардын маегинде болот, китептерди окуйт, ар кандай өмүр баяндар менен таанышат жана өзү үчүн адамгерчиликтин кооз оюм-чийимдерин тартат – мен адал болом, мен чынчыл болом, мен материалдык нерселерди эмес, рухий дөөлөттү жогору коём, мен чыккынчы эмес, берилген болом, мен жоопкерчиликтүү жана күчтүү болом жана башкалар. Ошентип, жигит өзүнө баалуулуктарды тандап алды, иргеди жана «менин баалуулуктарым бар» деп керилип, дүйнөгө жар салды. Бул байлыкка дароо чабуул башталат – жашоо сени ушундай абалга салат, адал болуу кыйын болот; ушундай зулумга кабыласың, калптан башка жолуң калбайт; ушундай муктаждыкка түшөсүң, рухий дөөлөтүңдөн акырындап жүз үйрөсүң; нафс жана шайтан ушундай айла кылат, бүлүктөрдүн айлампасында калып, өзүң байкабай чыккынчыга айланасың; ушунчалык чарчап, алсырайсың, жоопкерчилик сен үчүн түшкө окшоп калат; далыңа көзгө көрүнгөн жана көрүнбөгөн жүктөр үйүлөт, дарманың түгөнүп, «мен күчсүзмүн» деп айтууга туура келет. Жана ушул учурга келип карасаң, баалуулуктарың талап-тонолуптур; бир да баалуулугуң калбаптыр – «колуңдагы байлыкка, албетте, кол салынат» деп ушуну айтышат да. Мындан чыгат: сен баалуулуктарды ойлонуп тандашың керек; тандап алдыңбы, аларды ар дайым коргой билишиң зарыл; бул үчүн улуулардын, сага чындап кам көргөн бир кемел инсандын көрсөтмөлөрүнө кулак салганың туура. Эртең менен ойгонгондо адам баласы «мен бүгүн күнүмдү жакшы мүнөз менен өткөрөм» деп ниет кылса, кандай гана абалда болбосун бир жолу терең дем алып, анан сүйлөсө, бир топ машакаттардын алдын алса керек.

Акром МАЛИК