БИРИНЧИ БАП

БИРИНЧИ БАП ҮЙ-БҮЛӨНҮН ӨКҮМДАРЫ — АТА

Үчүнчү бөлүм Атанын үй-бүлөдөгү саясаты

(Башталышы. Уландысы)

Атанын уулга жана кызга карата мамилеси ар башка. Кызга катуу сүйлөбөйт, жумшак гана сүйлөйт. Атанын кызын өбүшү сунушталбайт, ошондой эле кыз да атасын өппөшү керек. Бул улуттук эски тарбиянын бир бөлүгү. Кыздын тарбиясы менен эне алектенет жана бул тууралуу өзүнчө бапта айтылат. Ата уулун көзөмөлдө кармаганда, мунун шарттары бар. Биринчиден, уул мүмкүн жана мүмкүн эмес иштердин тизмесин билиши керек, ага бул тууралуу этап-этабы менен жана өзүнчө маектерде жашына жараша айтылып турат. Экинчиден, ата айрым учурларда уулдун каталарына көз жумушу, ишаралар менен аны оңолууга чакырышы керек. Билип туруп, башкалардын кемчилигине көз жумуунун аты тагафул деп аталат жана сулуу мүнөздүн ондон тогуз бөлүгү тагафулдан турат деп айтылган. Үчүнчүдөн, ата уулдун жашы чоңойгон сайын ага өз алдынча чечим кабыл алышы үчүн шарт түзүп бериши керек, уул бул чечимдеринин артынан келе турган утулууларды да көрүшү жана корутунду чыгарышы шарт. Төртүнчүдөн, ата — перзент үчүн эң биринчи нафс тарбиячысы, башкача айтканда, перзенттин нафсын ата эң жакшы тарбиялоочу, ушул чындыкты унутпай, ата уулдун кутуруп бараткан нафсын тизгиндөөдөн артка чегинбесин. Атанын уулуна дене эмгегин, уюштуруу иштерин буйруусу, бул иштерди кантип аткарууну үйрөтүүсү табигый. Атанын уулуна жок дегенде үч өнөрдү — кол эмгегине байланышкан өнөрдү үйрөтүүсү, бул жагынан устага бериши жакшы иш, уул ошол өнөр аркылуу тиричилик кылбаса да, бул өнөр ага бүт өмүр бою чоң жардамчы болот. Ошондой эле, ата уул менен убакыт өткөрүү, саякатка чыгуу, белгилүү милдеттерди чогуу аткаруу иштерин да жасайт. Башкача айтканда, уул менен тоого, алыс сапарга, спортко, ар кандай иш-чараларга, ашка, тойго, маракеге, жаназага сыяктууларга чогуу барышы керек. Бул жүрүштө уул атаны жакшыраак таанып, рухий жактан ага жакшыраак байланат. Атанын «бардык тарбияны мен бере алам» дегени — ката. Албетте, уул үчүн кемчиликсиз устат издеши керек. Устаттын жашы улуу, үйлөнгөн, аты-абийирине так түшпөгөн, башка шакирттерди жетилтирген, ишенимдүү адам болушу максатка ылайык. Азыркы күндө устатты атанын өзү таппаса, уул бир устат тапса, ата аны менен жеке жолугат, эгер көңүлүнө жакса, анын кызматын кылат, уулу үчүн ага жакшылыктарды кылып турат. Бул көрсөтмөлөрдүн баары — сунуш, ал кемчиликсиз перзент тарбиялоо үчүн жалпы эрежелер, болгону, аларга амал кылынса, жакшы натыйжа болоруна үмүт бар.

Акром МАЛИК

(Уландысы бар)